د چارو ادارې لوی رئیس؛ د هرې ادارې مسؤول او امر مکلف دی چې د لاس لاندې کارکوونکو پوهاوی وکړي

د چارو ادارې لوی رئیس شیخ الحدیث مولوي نورالحق انور د دې ادارې اړوند ریاستونو له امرینو سره ناسته ترسره کړه.

شنبه، جمادي الاخر ۸مه/لیندۍ ۸مه.
یاده ناسته د چارو ادارې لوی ریاست د غونډو په تالار کې جوړه شوې وه؛ چې په کې د چارو ادارې لوی رئیس شیخ الحدیث مولوي نورالحق انور او اړوندو ریاستونو ټولو امرینو برخه اخیستې وه.

د چارو ادارې لوی رئیس وویل: که په چارو کې سستي، غفلت او بې غوري وشي، له اخروي تاوان سره سره دنیاوي تاون سره هم مخ کېږو؛ اسلامي امارت باید په تېرو ادارو قیاس نکړل شي، دلته ښه خدمت او سالم رقابت ته زمینه برابره شوې، نوازش، مقبولیت او ارتقاء هم له وړتیا کارولو او ښو فعالیتونو سره تړاو لري.

د چارو په اداره د ا.ا.ا. د مشرتابه او ټولو مسئولینو ښه باور دی، د ادارې د کفایت او اعتماد د لا زیاتوالي لپاره باید ټول لاس په کار شو.

د هرې ادارې مسؤول او امر مکلف دی، چې د لاس لاندې کارکوونکو پوهاوی وکړي؛ ظرفیت یې لوړ کړي او د ښه خدمت زمینه ورته برابره کړي.

په پای کې د ګډونوالو غوښتنې، ستونزې او د کاري بهیر لا چټکتیا په موخه نظرونه واورېدل شول او د حل ډاډ ورکړل شو.

دا غونډه چې د قرانکریم په تلاوت پیل شوې وه؛ د خیر دعاء سره پای ته ورسېده.