کنړ کې ۱۵۰ زلزله ځپلو کورنیو ته ۱۰قلمه خوراکي او غیر خوراکي توکي ووېشل شول

ربيع الاول ۱۲مه/وږي ۱۴مه.
د افغانستان اسلامي امارت د چارو ادارې لوی ریاست افغان ماشومانو لپاره د المان کمېټې په مالي ملاتړ د کنړ ولایت دیوه ګل دره کې پر ۱۵۰ زلزله ځپلو کورنیو ۱۰ قلمه خوراکي او غیر خوراکي توکو مرسته ووېشله.

قاري عبدالمتین رحیمزي، د چارو ادارې لوی ریاست د ښاروالیو چارو سمون عمومي ریاست د عملیاتي چارو رئیس، د دغو مرستو د وېش پر مهال د افغان ماشومانو لپاره د المان کمېټې مرستو قدرداني وکړه او زیاته یې کړه چې د کنړ زلزله ځپلو سیمو کې ګڼ شمېر کورونه ویجاړ شوي او خلک یې د هېوادوالو او خیریه مؤسسو لاسنیوي ته جدي اړتیا لري.

نوموړي وویل؛ دغه مرسته چې افغان ماشومانو لپاره د المان کمېټې پر مالي ملاتړ پر ۱۵۰ کورنیو ووېشل شوه، په کې ۱۰ قلمه خوراکي او غير خوراکي توکي شامل دي چې د ۵۰ کیلوګرامه اوړو یوه بوجۍ، ۱۰ کیلوګرامه غوړو بوشکه، ۱۰ کیلوګرامه وریجې، ۵ کیلوګرامه بوره، ۵ کیلوګرامه لوبیا، نیم کیلو چای، د څښاک اوبه، یوه کمپله او د یوې کورنۍ لپاره خېمه شامله وه.

د یادونې وړ ده چې د چارو ادارې لوی ریاست د ښاروالیو چارو سمون عمومي ریاست، مطبوعاتو ریاست او مالي ریاست ګډ پلاوی به د کنړ او ننګرهار ولایتونو هغو سیمو کې د نغدو او خوراکي توکو مرستو وېش ته ادامه ورکړي چې خلک ورته بیړنۍ اړتیا لري.