د افغانستان د اسلامي جمهوریت د چارو ادارې د لوی رئیس ډاکټر فضل محمود فضلي پيژندلیک

 

 

ډاکټر فضل محمود فضلي، د پوهندوی ډاکټر عبدالقدیر زوی، د ملک فضل الدین لمسی د ۱۳۵۶لمریز کال د وري په ۲۲ نیټه د جلال آباد ښار په درېیمه ناحیه کې زیږیدلی دی. ډاکټر فضلي ابتدایه، متوسطې، د لیسې او پوهنتون دورې زدکړې په جلال آباد ښار کې بشپړې کړي دي.

ډاکټر فضلي په ۱۳۷۹ لمریز کال د ننګرهار له طب پوهنځي څخه په لومړۍ درجه فارغ شو او د اکاډمیک رقابتي ازموینې له لارې د ننګرهار د طب پوهنځي د جراحۍ په دیپارتمنت کې د استادۍ دنده پيل کړه.

وروسته د تخصصي زدکړو د بشپړولو په خاطر برتانیې ته لاړ او هلته یې د تخصص د ترلاسه کولو وروسته اوه کاله د بریتانیې په مختلفو ښارونو کې د جراح ډاکټر په توګه دنده ترسره کړې.

همدارنګه په ۱۳۸۸ لمریز کال، په «کورني طب» کې د تخصص اخېستو په خاطر سویډن ته لاړ او هلته یې دویم تخصص ترلاسه او تر ۱۳۹۶لمریز کال پورې یې د سویډن په پلازمینه سټاکهولم په روغتون کې د کورني طب د متخصص ډاکټر په توګه دنده ترسره کړې ده.

 ډاکټر فضلي هغه مهال چې د لیسې او پوهنتون زده کوونکی و، تر څنګ یې د ننګرهار په راډیو تلویزون کې د اجیر په توګه هم دنده تر سره کړې ده.  ډاکټر فضلي د هنر په برخه کې د اسلامي خطاطۍ اوه قلمه خطاط دی او د هېواد په ختیځو ولایتونو کې یې په دغه هنر کې سلګونه شاګردان روزلي چې لا هم د دغه اسلامي هنر د ژوندي ساتلو لپاره هېواد ته خدمت کوي.

ډاکټر فضلي واده کړی، درې ماشومان یو زوی او دوه لوڼې لري.  هغه د پښتو او دري تر څنګ په انګلیسي، سویډني، ډنمارکي او نارويژي ژبو تسلط لري.

ډاکټر فضلي په بهر کې د زدکړو پر مهال هم له سیاست او افغان سیاستوالو سره اړیکې نه وې پرې کړې. هغه د ولسمشرۍ په درې دورو ټاکنو کې د افغانستان د اسلامي جمهوریت له جمهوررئیس جلالتماب محمد اشرف غني سره له نږدې کار کړی دی. همدارنګه یې په دغو ټاکنو کې د بهرمیشتو ځوانانو د انسجام په برخه کې زیاتې هڅې کړي دي.

ډاکټر فضل محمود فضلي په ۱۳۹۷لمریز کال کې د افغانستان د اسلامي جمهوریت د جمهوررئیس د یو فرمان په اساس د جمهوررئیس مشر سلاکار وټاکل شو او په دغه موده کې یې تر ډېره د هېواد د سیاسي مدیریت چارې پر مخ وړلې، چې د پارلماني او جمهوري ریاست د ټاکنو پروسو په چټکتیا کې یې مهم نقش درلود او دغه راز یې د هېواد د سیاسیونو ترمنځ د سیاسي اجماع په ایجاد او د هېواد لویو هېوادنیو مسائلو کې فعال رول درلود.

ډاکټر فضل محمود فضلي په ۱۳۹۹لمریز کال کې د جمهوررئیس د فرمان په اساس د جمهوري ریاست د چارو ادارې د لوی رئیس په توګه وټاکل شو.