افغانستان کې د برېښنایي حکومتوالۍ اکاډمي جوړیږي

د افغانستان اسلامي جمهوري دولت د جمهوري ریاست د چارو ادارې لوی ریاست د تخنیکي معاونیت  د وړاندیز شوې طرحې له مخې او د هېواد د جلالتمآب ولسمشر محمد اشرف غني د ځانګړي هدایت پر بنسټ په افغانستان کې د برېښنايي حکومتوالۍ  اکاډمۍ د جوړیدو لپاره عملي هڅې پیل شوې.

د تخنیکي معاونیت اړوند د سیتمونو او پروسو د نوي کولو او پراختیا ریاست ته د یادې طرحې د عملي کولو دندې سپارل  شوې ده، د همدې موخې د ترلاسه کولو لپاره د یاد ریاست کاري ټیم کابل پوهنتون سره تر خبرو وروسته دې هوکړې ته رسیدلی چې دغه اکاډمي به د کابل پوهنتون په چوکاټ کې ایجاد شي ترڅو د عصر له غوښتنو او معیارونو سره سم د حکومتوالۍ د پرمختللو برېښنايي سیتمونو د ترویج او بنسټیز کیدو لپاره کار وکړي.

څرګنده ده چې د برېښنايي حکومتوالۍ  اکاډمۍ ایجاد افغانستان کې یو ځانګړی نوښت بلل کیږي چې په جوړیدو سره به یې د حکومتوالۍ په سکتور کې نوي نوښتونه او ګړندیتوب رامنځته شي، د دې ترڅنګ به د بیروکراسۍ او عدم شفافیت مخه هم ونیول شي.

د یادونې ده چې د ملي یووالي حکومت پرلپسې تلاش کوي چې نړیوالو پرمختللو تجربو،غوښتنو،معیارونو او میکانیزمونو ته په کتو سره افغانستان کې بنسټیز کارونه او نوښتونه وکړي ترڅو خلکو ته د خدمتونو د وړاندې کولو بهیر چټک او ټول دولتي جوړښتونه په نویو وسایلو او ټکنالوژجۍ سمبال شي.