د زندانیانو، پایوازانو او مراجعینو لپاره د زندانونو چارو د سمون ادارې خدمات، اسانتياوې او اړينې لارښوونې.

نېټه:  ۲۲/۵/۱۴۴۷

مقدمه

د زندانونو د چارو د تنظیم اداره د جزایي اجرایي سیاست د وروستۍ مرجع په توګه، د مجرمینو د اصلاح، روزنې، ټولنې ته د بېرته ورستنېدو او د جرم د تکرار د مخنیوي ستر مسوولیت په غاړه لري.

دا دنده د نړۍ د حکومتونو له‌ پاره له تر ټولو ستونزمنو چارو څخه ده، او افغانستان هم له دې قاعدې مستثنا نه دی.

دغه اداره د خپلو دندو او مسوولیتونو په چوکاټ کې د پام وړ کړنې ترسره کړې دي، چې لاندې واضح شوي دي.

د ادارې ستراتیژیک اهداف:
د زندانونو چارو د تنظیم ادارې د ستراتیژیک پلان اصلاح او تطبیق د لاندې موخو د ترلاسه کولو لپاره طرحه شوې ده:
۱. د بنديانو اسلامي او اساسي حقونو ته تأمین.
۲. د ځواب ورکوونکی جوړښت، د حساب ورکونې شفافه بهیر.
۳. د جرمونو د سازماندهۍ او د زندانونو له دننه څخه د مجرمانه اقتصاد د مخنیوي لپاره هڅې.
۴. د زندانونو لپاره د اساسي او معیاري زیربناوو جوړول.
۵. د زندانونو مالي بوج د ملي بودجې څخه کمول او د ځان بسیاینې او ځان ملاتړ پر لور د هغوی سوق کول.

لومړی برخه: د مقام د دفتر د مراجعینو د منلو څانګې فعالیتونه

د زندانونو چارو د سمون ادارې د مراجعینو د منلو دفتر د دې موخې لپاره جوړ شوی، څو د مراجعینو غوښتنې او اسناد په منظم، چټک او شفاف ډول وڅېړل شي.

 دا دفتر هره ورځ په بېلابېلو برخو کې فعالیت کوي، چې تفصیل یې په لاندې ډول دی:

۱. د عرض‌پاڼو (عرایضو) برخه:

دغه برخه د مراجعینو عرض‌نامې ترلاسه کوي او ورته رسېدنه کوي. موضوعات یې عبارت دي له:

د بندیانو د یو زندان څخه بل زندان ته د انتقال غوښتنه.

د بندیانو ستونزې لکه د روغتیايي مسایلو، له خپلوانو او ملګرو سره د لیدنې غوښتنې.

هغه عرض پاڼې چې د مراجعینو د مالونو د تسلیمۍ یا ترلاسه کولو په تړاو له اړوندو محاکمو راجع شوې وي.

نور متفرقه او موردي عرض‌پاڼې.

د کار طریقه:
۱. مراجعین خپله لیکلې عرض‌پاڼه ترتیبوي او د مراجعینو د منلو دفتر ته مراجعه کوي.
۲. د منلو کارکوونکي عرض‌پاڼو څېړي، او له لوستلو وروسته یې د مقام د دفتر د عرض‌پاڼو مدیریت ته سپاري.

۳- د عرض‌پاڼو مدیریت:
د عرض پاڼو مدیریت د دقیقې ارزونې وروسته، موضوع د صلاحیت لرونکي مقام ته د لازم حکم د صادرېدو لپاره استوي.
۴- کله چې حکم صادر شي، د عرض‌پاڼو دفتر هغه په د عرض‌پاڼو په ځانګړي ثبت ‌کتاب کې درج کوي او بیا یې اړوند مراجعینو ته سپاري.
۵- له دې وروسته، عرض‌پاڼو د اړوندې څانګې له‌خوا تر وروستۍ مرحلې پورې تعقیبېږي او اجرا کېږي.

۲- د استعلامونو برخه:

• مراجعین د بېلابېلو ادارو څخه استعلامونه (پوښتنې یا غوښتنې) د ادارې د منلو دفتر ته وړاندې کوي.
  • د منلو دفتر دا استعلامونه ترلاسه کوي او د عرض‌پاڼو برخې ته یې استوي.
  • له ارزونې او مطالعې وروسته، استعلامونه په ځانګړي کتاب کې ثبتېږي او په رسمي ډول د اجرا لپاره اړوندې ادارې ته لېږل کېږي.
  • همدارنګه، مراجعین اړوندې څانګې ته معرفي کېږي تر څو د استعلام د اجرا او پایلې په اړه خبر شي.

۳- د خوشې کېدو د اسنادو برخه:

• هغه مراجعین چې د محاکمو د خوشې کېدو لیکونه ترلاسه کوي، لومړی د منلو دفتر ته مراجعه کوي.
  • د منلو کارکوونکي د خوشې کېدو لیک د نېټې، ساعت او دقیقې په یادښت سره د مراجعینو په ثبت‌کتاب کې درجوي.
  • وروسته، لیک اړوندې څانګې ته د رسمي ثبت لپاره سپارل کېږي.
  • اړونده څانګه له ثبت وروسته، لیک د اجرائیې څانګې ته استوي.
  • د وروستي حکم له صادرېدو وروسته، د منلو دفتر د مراجعینو په حضور کې لیک اړوندې څانګې ته تسلیموي، او د بندی خوشې کېدو عملي مراحل د هماغې څانګې له‌خوا ترسره کېږي.

۴- نورې متفرقه چارې:

• د اداري د بېلابېلو پړاوونو په ترڅ کې د مراجعینو دقیقه او هر اړخیزه لارښوونه
  • د نافذو طرزالعملونو او مقرراتو له مخې د ورته نورو چارو ترسره کول.

سهولتونه او امکانات چې د مراجعینو د منلو په دفتر کې رامنځته شوي دي:
• د مراجعینو د منلو لپاره د یو منظم دفتر جوړول، چې د رسمي وخت له پیل څخه تر ماذیګر ۵:۳۰ پورې فعال وي.
• د مراجعینو لپاره د مناسبو او منظم څوکیو برابرول تر څو د کار تر بشپړېدو پورې په آرامه توګه انتظار وباسي.
• د اسنادو د سپارلو دقیق وخت او نېټه د مراجعینو د ثبت په ځانګړي کتاب کې ثبتول.
• د مکتوبونو، استعلامونو او عرض‌پاڼو د وقفې پرته پر وخت اجرا، څو مراجعین د بلې ورځې لپاره انتظار و نه باسي او د هغوی کارونه ژر تر ژره تر سره شي.

دویمه برخه: د عدلي او قضایي بنسټونو سره د همغږۍ ریاست

د بندیانو لپاره خدمتونه

۱- د بندیانو خوشې کېدل:
هغه بندیان چې د محکمې ټاکل شوی بند بشپړوي، یا هم د سترې محکمې د محترم مقام له خوا ورته د تخفیف محاسبه شوې وي، له بند څخه خوشې کېږي.
همدارنګه، هغه تورن چې محکمې د هغوی تېر بند د سزا لپاره کافي وبولي، یا د جرم د نه‌ثبوت له امله بې‌ګناه اعلان شي، د هغوی د خوشې کېدو لیکونه د اړوندو محترمو محاکمو له خوا ترتیبېږي.
دغه لیکونه د څلورو زونونو د عمومي محاکمو، د کابل د استیناف محکمې، او د کابل د زون د نظامي محکمې له خوا د لاسلیک وروسته، د بندیانو د خپلوانو، د ادارې د انتقال پرسونل یا د پوستې له لارې د زندانونو  چارو د سمون ادارې ته رارسېږي.

د جعل او تزویر د مخنیوي په موخه، د خوشې کېدو د لیکونو عکسونه د اړوندو محاکمو له خوا د واټس‌اپ له لارې د عدلي او قضایي اورګانونو سره  د همغږۍ رئیس سره شریکېږي.
له دې وروسته، د زندانونو  چارو د سمون اداره دغه مکتوبونه د ثبت او تایید وروسته  یاد ریاست ته سپاري.
یاد ریاست بیا د دقیقې ارزونې او د محکمې له لوري د استول شویو معلوماتو له تطبیق وروسته، د کابل ولایت د محبسونو او توقیف‌خونو ریاستونو، د پلچرخي مرکزي محبس، د ماشومانو د اصلاح او روزنې مرکز، د کابل د ښځینه محبس، او د مخدره موادو د ځانګړي محبس ته د قانوني اجرا لپاره استوي.

۲- د بندیانو د انتقال او بدلون چارې:
هغه بندیان چې د عرض پاڼې یا د خپلوانو د غوښتنې له مخې غواړي د بند ځای بدل کړي، د زندانونو چارو د سمون ادارې د محترم مقام د هدایت او د دې ریاست د دقیقې ارزونې او د انتقال د طرزالعمل له مخې اړوندو ولایتونو ته انتقالېږي.
د بندیانو انتقال د تابعیت د تذکرې یا د اوسني استوګنځي د ښاروالۍ د تصدیق پر بنسټ ترسره کېږي.

۳- د دوسیو د انتقال اجراات:
د اصولو د قانون د ۱۱مې مادې له مخې، که د تورنو دوسیې د یوه ولایت له محکمې څخه بل ولایت ته د صلاحیت د انتقال اړتیا ولري، دا کار د محاکمو د غوښتنې او د ذیصلاح مقاماتو د هدایت له مخې ترسره کېږي.
د عدلي او قضایي بنسټونو د همغږۍ ریاست د تورنو د انتقال او د هغوی د قضایي جلسو د ګډون لپاره ژر تر ژره عملي ګامونه اخلي.

۴- د محکمې جلسو ته د تورنو انتقال:
هغه تورن او بندیان چې د محکمې له خوا د قضایي جلسې د ګډون لپاره غوښتل کېږي، د محبس د اصولي محافظینو په ملتیا اړوندو محاکمو ته انتقالېږي.
جلسې د متهم او مدعي د حضور په شتون کې ترسره کېږي، او پرېکړې صادرېږي، خو کله ناکله د پرېکړې لیک په وخت د زندانونو چارو د سمون ادارې ته نه رارسېږي.
په دې حالت کې، د عدلي او قضایي بنسټونو د همغږۍ ریاست د زون محاکمو ته جلا مکتوبونه استوي، تر څو د پرېکړو د استولو په برخه کې لازم اقدامات وکړي.

د کابل ښار د څلورو زونونو، ولسوالیو، د کابل ولایت محترم استیناف محکمې او مرکزي تمیز محترم مقام د فیصلو غوښتنه کوي.

۵- هغه تورن او بندیان چې د اصولو د محاکمو د قانون په اساس د قضایي جلسو د ګډون لپاره د اړوندو محاکمو له خوا غوښتنه نه وي شوې، توقیف‌خونې او مرکزي محابسو د هغوی د بې‌سرنوشتۍ موضوع د تعقیب او برخلیک د ټاکلو په موخه د عدلي او قضایي بنسټونو د همغږۍ ریاست ته لیږي.

 یاد ریاست د جلا مکتوبونو له لارې دغه موضوع اړوندو محاکمو سره شریکوي، څو د قضایي جلسو د ګډون لپاره قانوني غوښتنه ترسره شي.

۶- هغه بندیان او تورن چې د اړوندو محاکمو له خوا د قضایي جلسو د ګډون لپاره غوښتل شوي او پرې پرېکړه شوې وي، د دوی د پریکړو یوه برخه د اړوندو محاکمو له لارې او بله برخه د کابل د جنایي تحقیقاتو ریاست او د کورنیو چارو وزارت د جرمونو د کشف ریاست له لارې د زندانونو چارو د سمون ادارې ته لیږل کېږي.

 دغه پریکړې وروسته د عدلي او قضایي بنسټونو د همغږۍ ریاست ته د تطبیق لپاره سپارل کېږي، چې ریاست د دقیقې څېړنې او د بندیانو د شتون له تایید وروسته، د محبسونو او توقیف‌خونو اړوندو ادارو ته د محکمې د حکم د پلي کولو لپاره استوي.

۷- هغه بندیان او تورن چې د ناروغۍ له امله په ولایتونو کې د موجوده روغتونونو امکانات یې کافي نه وي، د اړوندو ولایتونو د ډاکترانو او د زندانونو چارو د سمون ادارې د روغتیايي رئیس د نظر له مخې د ښې درملنې لپاره ولایت حوزوي روغتونونو ته لېږدول کېږي، د درملنې او معايناتو بشپړېدو وروسته، بېرته خپلو محبسونو ته استول کېږي.

که د حوزوي روغتونونو امکانات هم کافي نه وي، د ډاکترانو د وړاندیز پر اساس ناروغان مرکز ته انتقالېږي او هلته تر درملنې لاندې نیول کېږي.

۸- هغه تورن او بندیان چې مالي وس نلري او د مدافع وکیل د نیولو توان نه لري، د عدلي او قضایي بنسټونو د همغږۍ ریاست لخوا پیژندل کېږي.

دغه ریاست د هغوی د عرض‌پاڼو پر اساس، د افغانستان اسلامي امارت د عدلیې وزارت ته رسمي مکتوبونه استوي، څو د هغوی لپاره حقوقي مرستندویان (مساعدین حقوق) وټاکل شي.

همدارنګه د دغه بندیانو د بهترې همکارۍ په موخه، د عدلیې وزارت یو استازی د دندې په توګه د همغږۍ په ریاست کې ګمارل کیږي.

د مراجعینو او پایوازانو لپاره خدمتونه

۱-  یو شمېر هېوادوال چې پخوا د جرمونو له امله د عدلي او کشفي ارګانونو له خوا نیول شوي وو، او د تېر حکومت د محاکمو د فیصلو له مخې محکوم شوي، او وروسته د اسلامي امارت د فتحې پر مهال له بندونو خوشې شوي دي، یا هغه کسان چې وروسته د محاکمو د حکم له مخې سزا بشپړه کړې او له بند څخه ازاد شوي دي، د پاسپورټ، تابعیت تذکرې او دندې د اخیستلو لپاره اړوندو ادارو ته مراجعه کوي. د هغوی مسوولیت یا عدم مسوولیت د دقیقې څېړنې او د مراجعینو د وخت ضایع کېدو د مخنیوي لپاره، د همغږۍ ریاست د ټول هېواد د بندیانو، تورن او محجوزینو لپاره یو جامع ډیټابیس جوړ کړی دی. کله چې د مسوولیت په اړه استعلام د کورنیو چارو وزارت د کریمنال تخنیک ریاست له لارې راځي، دغه ریاست په لنډ وخت کې دقیق ځواب چمتو کوي او اړوندو ادارو ته یې استوي.

۲- د مراجعینو د غوښتنو او عرض پاڼوته پر وخت رسېدنه:
یوه شمیر مراجعین د خپلو بندیانو د ستونزو د حل لپاره د همغږۍ ریاست ته مراجعه کوي. د دوی عرض‌پاڼې لکه د بندیانو د انتقال غوښتنه، د مالونو یا وسایطو د بېرته ترلاسه کولو غوښتنه، د بندیانو د موجودیت یا ن ه‌موجودیت تصدیق، او د کابل ولایت د حقوقو ریاست او د کابل د زون د وثایقو محکمې له لارې د حکم د ابلاغ یا معلوماتو لپاره استعلامونه، د ذیصلاح مقاماتو د احکامو او طرزالعملونو له مخې څېړل کېږي او عملي کېږي.

۳ـ  د موخو ته د رسېدو لپاره د ستونزواورېدنه، د سالمې سلاح مشورې:
مراجعین او پایوازان چې د عدلي او قضایي بنسټونو د همغږۍ ریاست ته مراجعه کوي او د خپلو بندیانو په اړه معلومات او مشورې غواړي، د همغږۍ ریاست د ښه چلند او سالمو مشورو له لارې مراجعینو ته خدمت کوي او د هغوی قناعت حاصلوي.

۴ـ د معلوماتو شریکول (جرمي قضیې، د څار نېټه، د حبس موده، او د خوشې کېدو نېټه) د مرکز او ولایتونو محابسو تورنو او محبوسینو په اړه مراجعینو ته:
مراجعین او پایوازان چې د خپلو بندیانو د موجودیت، جرم، د نظارت نېټه، د حبس موده، پاتې حبس او د رهایي نېټې په اړه معلومات غواړي، د عدلي او قضایي بنسټونو د همغږۍ ریاست د مرکز او ولایتونو له زندانونو څخه اړین معلومات ترلاسه کوي او د مراجعینو قناعت ترلاسه کوي.

۵ـ د لادرکۍ او د هغه د موندلو لپاره همکاري په برخه کې د مرکز ولایتونو سره اړیکو نیول:
مراجعین او پایوازان چې د خپلو بندیانو د موجودیت او وضعیت د معلومولو لپاره همغږۍ ریاست ته مراجعه کوي، دغه ریاست د مرکز او ولایتونو له زندانونو څخه د معلوماتو غوښتنه کوي.

 که چیرې زنداني موجود وي، مراجعینو ته دقیق معلومات ورکول کېږي او د هغوی قناعت ترلاسه کېږي.

۶ـ د مراجعینو ملاتړ چې له لیرې ولایتونو څخه د ملاقات لپاره راځي:
هغه مراجعین چې د لیرې ولایتونو څخه د خپلو بندیانو د ملاقات لپاره مراجعه کوي، خو د ملاقات د نېټې د معلومولو له نشتوالي له امله ستونزه لري، او که ملاقات کوونکي د بندی په کورنۍ کې د پلار، مور، میرمن، زوی یا لور وي او تر اوسه یې له زنداني سره ملاقات نه وي کړی، د همغږۍ ریاست لخوا ورته د ملاقات پارچه ورکول کېږي.
خو هغه پایوازان چې د کابل ولایت یا نږدې ولایتونو څخه راځي او د ملاقات نېټه یې معلومه وي یا له زنداني سره یو یا دوه ځله ملاقات کړی وي، د ملاقات مستحق نه ګڼل کېږي.

که دوی د زندان دننه د منعه شویو توکو (لکه کالي او نور) کوم توکي ونه لري، هغه توکي به د دوی له خوا په رضایت د همغږۍ ریاست پرسونل ته وسپارل شي او په چټکۍ سره به زندانیانو ته وسپارل شي، او پایوازانو ته به ډاډ ورکړل شي.

۷ـ چمتو کول د دقیقو معلوماتو په اړه (موجودیت، عدم موجودیت، جرم، د نظارت نېټه او اړوند محبس) د محبوسینو او متهمینو د محکمو، د ثبت اسنادو او وثایقو حوزه های کابل ښار او د ولایت د حقوقو ریاست او نورو اړوندو مراجعو له خوا د غوښتنې پر اساس.

درېیمه برخه د څرخي پله مرکزي محبس

د مرکزي محبس ریاست

د اداري چارو معاونیت د بندیانو او مراجعينو لپاره خدمات او اسانتیاوې په لاندې ډول دي:
د محترمو چارواکو په لارښوونه هره اوونۍ یو ځل د ټولو بندیانو لپاره د لیدنې زمینه برابریږي، چې لیدونکي (پایوازان) وروسته له دقیقې تلاشي په ټاکلي ځای کې په بلاکونو کې په حضوري توګه له خپلو بندیانو سره ملاقات کوي، او د لیدنې له ختمېدو وروسته ورته د وتلو اجازه ورکول کېږي.
وخت نا وخت په ټولو بلاکونو کې له بندیانو سره ملاقات کیږي، د هغوی ستونزې اورېدل کېږي او رفع کېږي، یا که اړتیا وي د اړوندو مسوولینو او چارواکو ته د حل لپاره وړاندې کېږي.
د بې وزلو بندیانو لپاره چې لیدونکي ونه لري، هغوی د عدلیې وزارت محترمو مساعدینو ته معرفي کېږي.

د ټولو بندیانو لپاره د حرفوي روزنې، دندې موندنې او ورزش زمینه برابره شوې ده.
په ټولو بلاکونو کې د دیني درسونو د تدریس زمینه مساعده شوې ده.
په بلاکونو کې د ټولو بندیانو لپاره د بهرنیو ژبو د زده کړې زمینه برابره شوې ده.
د بندیانو خوراک او څښاک هره ورځ له خوا د پخلي، صفايۍ او عادلانه وېش د څارنې لاندې دي او دا کار د معاونیت لخوا کنټرول کېږي.
د پرسونل له خوا د بندیانو سره چلند هره ورځ څارل کېږي.
د بندیانو، لیدونکو او مراجعينو شکایتونه په خلاص زړه اورېدل کېږي او ژر تر ژره حل کېږي.
د بندیانو د اسانتیا لپاره له کورنیو او بهرنیو موسسو سره ملاقاتونه ترسره کېږي.

د مدیریت پلان او عملیات:
۱. د ورزش، ګرځېدو او د لمر انرژي د استفادې لپاره، د ورځې د وخت د وېش او پلان له مخې بندیانو ته په یوه ساعت لپاره (خلاص ځای) کې د فعالیت اجازه ورکول کېږي.
۲. د بندیانو د لیدونکو د سرګردانۍ د مخنیوي لپاره، د لیدنې ورځې د منظم مهال وېش له مخې تنظیم شوې دي او د هر برج لپاره د اړوندو شعبو ته د تایید وروسته تکثیر کېږي.

۳. هغه کسان چې د قانوني معذرتونو له مخې او د خپلو ستونزو د حل لپاره مرکزي محبس ته مراجعه کوي، د هغوی اسناد په دقت سره معاینه کیږي، او وروسته له دې چې د محبس له مشرتابه لارښوونه ترلاسه شي، د دې ریاست په ګارډ یا دروازې کې د مراجعينو نومونه په کتاب کې ثبت کیږي، بیا د دقیقې تلاشي وروسته اړوند ځای ته لارښوونه کیږي او هغوی ته د داخلېدو اجازه ورکول کېږي.

۴. د معلول، سپین ږیرو او هغو ښځو لپاره چې له ځان سره کوچني ماشومان لري، د ملاقات په ورځو کې یوه موټر (کاستر/انټرنشنل بس) چمتو شوی دی چې د هغوی له لومړۍ دروازې څخه د محبس د ګارډ ځای ته د انتقال مسؤلیت لري.

۵. د پورته یادو چارو د ښه تطبیق او نظم د رامنځته کولو لپاره، تدابیري او اجرایي پلانونه جوړ شوي او اړوندو څانګو ته ورکړل شوي دي.

د محاکمو د اړیکو ریاست:

د دې ریاست لاندې څانګې مراجعینو او محبوسینو ته لاندې خدمتونه وړاندې کوي:

د محاکمو د اړیکو عمومي مدیریت:

د دې مدیریت فعالیتونه د بېلابېلو محبوسینو او تورنو په اړه دي، لکه د محاکمو (عدلي او قضایي بنسټونو) لخوا د محبوسینو د بښنې او تخفیف د جدوولونو لیږدول او خپرول، فعالو بلاکونو کې د زندانیانو موجودیت څرنګوالی، د محبوسینو ستونزو ته رسیدنه، د بې‌سرنوشتو محبوسینو حالت معلومول، د فیصلو، قضایي قرارونو، اطلاع‌نامو او د محبوسینو د تعقیب د ضرورتونو غوښتنه، او د محبوسینو خوشې کول د مربوطه بلاکونو د نظارت کوونکو له لارې چې د مرکزي محبس ریاست پورې اړه لري.

عمومي مدیریت د فرمانونو تطبیق:
د امیرالمؤمنین (حفظه الله) د بښنې او تخفیف فرمانونو د تطبیق څرنګوالی داسې دی چې وروسته له دې چې محبوسین چې د بښنې او تخفیف مستحق وي، د محکمې د قاضیانو له خوا تثبیت شي، د هغوی جداول دې ادارې ته د تطبیق لپاره لیږل کېږي.

هغه کسان چې بښل شوي وي، بې له ځنډه د محبس له دروازې خوشې کېږي، او هغه محبوسین چې تخفیف ورته شوی وي، د دوی تخفیف تطبیق او د دوسیې سره ضمیمه کېږي.

 د تطبیق او نه تطبیق په اړه د قانون په رڼا کې محاکمو ته اطمینان ورکول کېږي.

عمومي مدیریت د قبولی او ثبت قضایا:
کله چې نوي محبوسین له ولایتي زندانونو یا نورو مراجعینو څخه مرکزي محبس ته د ساتنې او حفاظت لپاره راوړل کېږي، د قبولي مسؤلینو لخوا د دوی دوسیه په دقت سره معاینه کېږي، د هغوی روغتیایي حالت پوښتل کېږي او ظاهري معاینه پرې کېږي تر څو معلومه شي چې د وهل ټک وهل نښې نښانې نه لري او کوم قانوني خنډ نه وي، د قبولي کمېټه چې ډاکټران، کشفي مسؤلین او قبولي مسؤلین پکې شامل وي، محبوسین قبولي کوي، دوی بلاکونو ته سپاري او دوسیې د محاکمو د اړیکو امریت کې ساتل کېږي.

عمومي مدیریت د خوشې کولو او تبدیلیو:
هغه محبوسین چې د خپل حبس موده بشپړه کوي او د محاکمو اړوند مکاتبات د خوشې کولو لپاره دې امریت ته رسیږي، وروسته له دوسیې د کتنې او د قانوني موانعو د نشتوالي په صورت کې چې په نورو قضیو کې جرم نه وي کړی، د قانون او طرزالعمل په اساس د محبس له دروازې خوشې کېږي، هغه محبوسین چې موده یې بشپړه کړې خو مکتوبونو نه وي راغلي، د خوشې کولو لپاره محاکمو ته معرفي کېږي، چې دوی د دوسیې د کتنې وروسته خوشې کوي. همدارنګه، د تبدیلیو محبوسین د ټاکل شوي طرزالعمل مطابق انتقال او تبدیلی ترسره کېږي.

د ښوونې او بیا روزنې عمومي مدیریت:
په مرکزي محبس کې هره ورځ د علماوو لخوا د ټاکل شوې تقسیم اوقات په اساس، ټولو محبوسینو ته اسلامي تعلیمات لکه قاعده، تجوید، حفظ قرآن او نور دیني کتابونه تدریس کېږي.

هغه کسان چې د مسلکي زده کړو لیوالتیا لري، جذب او د صنعت مدیریت ته معرفي کېږي. همدارنګه د سواد زده کړه او د ورزش لکه سپورت او والیبال لوبې د محبوسینو او متهمینو ترمنځ د بلاکونو دننه تدریس او پرمخ وړل کېږي.

د محبوسینو صنف بندی مدیریت:
د منظور شوي طرزالعمل مطابق، محبوسین باید د جنس، عمر، جرم ډول، د جرم شدت، روغتیایي او رواني حالت، او ټولنیز موقف له مخې په بلاکونو کې صنف بندی شي، خوشبختانه په دې وروستیو کې ټول محبوسین د یوې ټاکلې کمېټې لخوا صنف بندي شوي او نوي راغلي محبوسین هم صنف بندي شوي او د تطبیق لپاره هره میاشت اړوند امنیتي قطعاتو قومندانۍ ته لیږل کېږي.

د حضوري او غیرحضوري ملاقاتونو مدیریت:
د لوړ پوړو مسؤلینو د هدایتونو مطابق، د مرکزي محبس ټولو محبوسینو لپاره په هره اوونۍ کې د شنبې او دوشنبې ورځو کې د ملاقات زمینه برابره شوې ده، د ټولو زندانیانو قریبي خپلوان کولای شي په ټاکل شویو ورځو کې محبوسینو سره ملاقات وکړي.

هغه محبوسین چې غوښتونکي وي له خپلې ښځې سره خصوصي ملاقات ولري (چې مخکې تثبیت شوې وي او ښځه له اړوند مراجعو تثبیت شوې وي)، د حضوري ملاقات مسؤلینو لخوا ځانګړی فورم ورته ورکول کېږي چې د بشپړولو او تائید وروسته ورته د ملاقات اجازه په ځانګړي ځای کې ورکول کېږي.

د آرشیف او معلوماتو امریت:
هغه محبوسین چې د خپل حبس له بشپړېدو وروسته خوشې کېږي، د دوی دوسیې وروسته له نمبرګذاري په ځانګړو الماریو کې ساتل کېږي او یوه کاپي یې د کاغذي دوسیې سکن شوې او په دې امریت پورې اړوند کمپیوټر کې ثبت او راجستر کېږي.

د بایومتریک امریت:
د قانون او ادارې د پالیسیو له مخې، ټول هغه محبوسین چې پرې د محکمې حکم قطعي شوی وي، بایومتریک کېږي.

 د بایومتریک یوه کاپي د نورو اجراآتو لپاره د کورنیو چارو وزارت د جنایي جرمونو مبارزې ریاست ته هم لېږل کېږي، ترڅو د جرم د بیا تکرار پر وخت پېژندنه او ثبوت یې وشي.

د مخابرې امریت:
امریت مخابره محبوسینو ته لاندې اسانتیاوې برابرې کړې دي:
د زندان د تنظیم قانون له مخې، محبوسین چې سلب ازادي شوي وي، حق لري له خپلوانو سره خبرې وکړي. په همدې اساس، په ټولو فعال بلاکونو کې د اړتیا په اساس (PCO) عام مخابراتي خدمات محبوسینو ته ورکول کېږي. د محبس په ټولو بلاکونو کې ۵۱ ټیلیفونونه نصب شوي چې د ۲۴ ساعتونو لپاره فعال وي. که چیرې کومه ستونزه پېښه شي، په چټکۍ سره د ټیکنالوژۍ ریاست ته خبر ورکول کېږي.

د تعمیراتو مدیریت:
مدیریت تعمیرات د محبوسینو او مراجعینو د اسانتیا لپاره لاندې دندې ترسره کوي:
د برښنا، اوبو رسولو او کانالیزیشن سیستمونه تل فعال وي، که کومه ستونزه رامنځته شي، د دې مدیریت فني پرسونل یې ژر تر ژره ترمیموي او بیا فعاله کوي. د مدیریت پرسونل ۲۴ ساعته په خدمت کې دي. د مرکزي محبس ټولې ساحې د پروژکتورونو او ګروپونو په مرسته روښانه ساتل شوي دي. که چیرې تشناب کې کومه ستونزه یا بندښت رامنځته شي، نلدوانان یې په چټکۍ سره ترمیموي.

د صحیې امریت:
د مرکزي زندان صحیه امریت د محبوسینو لپاره لاندې اسانتیاوې برابروي:
د محبس په لومړي او اتم بلاک کې یو یو کلینیک جوړ شوی دی، او همدارنګه په بلاکونو کې یو کلینیک د شپږو بلاکونو د محبوسینو لپاره فعال دی. په دې کلینیکونو کې ناروغان معاينه کېږي، اړین دواګانې ورته ورکول کېږي او که ضرورت وي، د ۲۰ بسترو روغتون ته راجع کېږي. په یاد روغتون کې د ایکسري، لابراتوار، ECG، د غاښونو څانګې فعالې دي چې ورځنۍ معاینات ترسره کوي. ناروغان دلته بستر کېږي او درملنه ترلاسه کوي، که چیرې امکانات کم وي، نو ۵۰ بستره روغتون یا بهرني روغتونونو ته راجع کېږي. د پایوازۍ ورځو کې د احمد ګیټ په دروازه یو ډاکټر ګمارل شوی چې د نشه يي توکو او غیر قانوني دواګانو مخنیوی کوي.

د لوژستیک مدیریت:
د لوژستیک مدیریت د محبوسینو لپاره لاندې خدمات وړاندې کوي:
ټول پرسونل د ۲۴ ساعتونو لپاره په خدمت کې دي. د محبوسینو د خوراک او هستوګنې توکي په روښانه، پاک او منظم ډول د معیارونو او تابلو مطابق ورته ویشل کېږي. د سره صلیب لخوا موسمي کالي ورکول کېږي، که چیرې له دې موسسې څخه کالي ور نه کړل شي، نو د دې مدیریت له لوري په ټاکلي وخت ورته ویشل کېږي.

د کابل ولایت د توقیفخونو ریاست

د کابل ولایت توقیفخونه د ریاست په کچه د تورنو د خپلوانو سره د لیدنې د مرحلو د بشپړولو لپاره د خدماتو او اسانتیاوو طریقه په لاندې ډول ده:

۱- د لیدنې (د متهمینو د خپلوانو سره ملاقات) په اړه، د کابل ولایت توقیفخونې ریاست، د نشه‌يي توکو د مبارزې توقیفخونې او د دوو ولسوالیو (شکردره او سروبي) توقیفخونې هره اونۍ د یکشنبې په ورځ، د پلان او امنیتي تدابیرو سره سم، د قانوني اصولو او شرعي حقوقو په پام کې نیولو سره، له سهار ۸:۰۰ بجو څخه تر ماسپښین ۴:۰۰ بجو پورې، د ۲۸۰۰ څخه تر ۳۰۰۰ متهمینو او نږدې ۵۰۰۰ څخه تر ۵۵۰۰ د متهمینو خپلوانو چې له کابل او نورو ولایتونو راځي، د بدني تلاشي او توکو د چک کولو وروسته، په درناوي او د بشري کرامت په رعایت، پرته له کوم ځورونې، خپل ملاقاتونه ترسره کوي.

۲- د کابل ولایت توقیفخونې ریاست د مراجعینو ستونزو د حل لپاره د شنبې څخه تر پنجشنبې پورې، پرته له غرمې ډوډۍ د لمونځ د وقفې، د ځنډ د اصولو او قانون په چوکاټ کې خپل خدمتونه وړاندې کوي.

۳- د کابل ولایت توقیفخونې ریاست د ممنوعه توکو او خام خوړو (لکه غوښه، دانه‌ لرونکي، سبزيجات) پرته، هر ډول پخې شوي او چمتو شوي خواړه چې د متهمینو خپلوان راوړلي وي، وروسته له تلاشي، چک او کنټرول، د متهمینو لپاره اجازه ورکول کیږي.

پنځمه برخه: د زندانیانو او مراجعینو لپاره د شخصي دوسیو تنظیم او ملاقاتونو د امریت خدمات او اسانتیاوې

الف: د زندانیانو د خپلوانو، مدافع وکیلانو او کورنیو سره درې ځله په میاشت کې د ټاکل شویو ورځو په جریان کې حضوري ملاقاتونو زمینه برابره شوې ده.

ب: د زندانیانو د میرمنو د ملاقات لپاره زمینې برابرول:
د واده شویو زندانیانو لپاره د خپلې قانوني میرمنې سره د ملاقات اجازه ورکول کېږي، مشروط پر دې چې شرعي نکاح خط ولري، او که نکاح خط نه وي، نو د ځانګړې فورمې ترلاسه کولو وروسته چې د زندان له خوا ورکول کېږي، او له تایید، کلی پاس او د ناحیې یا ولسوالۍ د مسؤلینو له لارې د قانوني مراحلو بشپړولو وروسته ملاقات ترسره کېږي.

ج: د زندانیانو د خپلوانو سره د ټیلیفون له لارې غیر حضوري ملاقاتونو زمینې برابرول.

د: د اصلاح، تعلیمي او حرفوي پرمختګونو د ارزولو لپاره د شخصیتي دوسیو ترتیب.
د زنداني شخصیتي دوسیه چې دوه برخې لري؛ د زنداني چلند او شخصي بدلونونه او همدارنګه تعلیمي او حرفوي پرمختګونه. دا دوسیه د زنداني د اصلاحاتو راپور ترتیبوي، د چلند برخه کې د چارواکو او نورو زندانیانو سره رویه، د دودونو مراعات، اطاعت او د شخړو او جنګونو څخه ډډه شامله ده، تعلیمي او حرفوي برخه کې د دیني، عصري او حرفوي زده کړو پرمختګ شامل دي.

حضوري ملاقات:
د زنداني مستقیم لیدنه له خپلوانو یا مدافع وکیل سره په ځانګړي ټاکل شوي ځای کې او د زندان د مسؤلینو تر امنیتي تدابیرو لاندې ترسره کېږي.

د حضوري ملاقات وخت:
هر زنداني کولای شي چې درې ځله په میاشت کې له هغو خپلوانو سره ملاقات وکړي چې په دوسیه کې یې نوم ثبت شوی وي. دغه ملاقاتونه په مرکز او ولایتونو کې د زندانونو له خوا په اونۍ کې دوه ټاکلي ورځې کېږي، او له سهار ۹ بجو څخه تر مازیګر ۳ بجو پورې دوام کوي.

خصوصي ملاقات:
واده شوي زندانیان کولای شي چې له خپلې قانوني میرمنې سره خصوصي ملاقات ولري، مشروط پر دې چې شرعي نکاح خط ولري. که نکاح خط شرعي ونه لري، نو د ملاقات د ځانګړې فورمې ترلاسه کولو وروسته، له تایید، کلی پاس او د ناحیې یا ولسوالۍ له مسؤلینو سره د قانوني مراحلو بشپړولو وروسته، اجازه ورکول کېږي چې خصوصي ملاقات وکړي.

پایوازان (ملاقات کوونکي) شرایط
په ملاقات کې د لاندې شرایطو رعایت کول اړین دي:

• د زندان دننه قوانین او مقررات مراعاتول.
• په ټاکل شوي وخت کې د مربوطه زندان د دروازې مخې ته حاضرېدل.
• د زندان د مسؤلینو لارښوونو سره سم عمل کول.
• د تابعیت تذکره اصلي نسخه، پاسپورت یا لایسنس درلودل.
• د خصوصي ملاقاتونو لپاره نکاح خط یا ځانګړې فورمې درلودل.

غیر حضوري ملاقات:
زندانیان کولای شي چې په مرکز او ولایتونو کې د خپلو خپلوانو سره د ټیلیفون له لارې اړیکه ونیسي. دغه اړیکې د دولتي تلیفونونو له لارې او د امنیتي تدابیرو په شتون کې ترسره کېږي.

د شخصیتي دوسیو ترتیب (د زنداني اصلاح راپور):
متقاضی (خپلوان، مدافع وکیل یا اړوند اداره) باید لومړی یوه رسمي غوښتنه (عریضه) سترې محکمې ته وړاندې کړي تر څو د زنداني د اصلاح راپور د عفو یا تخفیف لپاره ترلاسه کړي. وروسته له تایید څخه، اړوند محکمه رسمي لیک د زندانونو چارو د سمون ادارې ته استوي.

د زنداني شخصیتي دوسیه دوه برخې لري: د چلند او شخصیت بدلونونه، او تعلیمي او حرفوي پرمختګونه.

• د چلند بدلونونه پکې د مسؤلینو او نورو زندانیانو سره رویه، د دندو ترسره کول، د دودونو مراعات، اطاعت او شخړو څخه ډډه کول شامل دي.
• تعلیمي او حرفوي پرمختګونه پکې دیني زده کړې، عصري او حرفوي زده کړې شاملي دي.

شپږک برخه: د روغتیا ریاست خدمات او اسانتیاوې

په دې روغتون کې لاندې صحي خدمات وړاندې کېږي:

1. د سراپا ناروغانو معاینه (زندانیان، کارکوونکي، عاجل پیښې، د زندانیانو میلمانه او د کارکوونکو کورنۍ). دا خدمات په OPD برخه کې هره ورځ شاوخوا ۷۰ تر ۱۰۰ ناروغانو ته وړاندې کېږي، په دې کې د کارکوونکو، زندانیانو، ښځینه او رواني ناروغانو معاینات شامل دي.
2. د بستر دننه مراقبتونه (IPD): هغه ناروغان چې بستر ته اړتیا لري په دې برخه کې ساتل کېږي. اوس مهال شاوخوا ۲۳ بسترونه فعال دي.
3. لابراتوار (Laboratory): د ۵۰ بستریز روغتون مجهز لابراتوار لري چې د تجربه لرونکو کارکوونکو لخوا د لوړ کیفیت معاینات ترسره کېږي.
4. د زړه ګراف (ECG)، الټراسوند او ایکسرې: که ناروغ اړتیا ولري، د دې معایناتو خدمات د روغتون ډاکټرانو لخوا وړاندې کېږي.

5. درملتون - Pharmacy)
   داکترانو لخوا ټاکل شوي درمل د ناروغانو لپاره وېشل کېږي.
   ریفر سیسټم - Referral system) که ځینې ناروغان په دې روغتون کې درملنه ونه شي، د ناروغانو ریفر سیسټم فعال دی چې عاجل ناروغان د مسؤل ډاکټرانو په لارښوونه په دې روغتون کې امبولانس له لارې بهرنیو روغتونونو ته انتقالېږي.
6. د دې روغتون د ستوماتولوژي څانګې کې د ادارې کارکوونکو لپاره د غاښونو درملنه، کشول او ډکول ترسره کېږي، او همداشان یوازې د غاښونو درملنه او کشول د محبوسینو لپاره هم کیږي.
7. د ناروغانو لپاره د نرسنګ خدمات:
   په دې روغتون کې تجربه لرونکي او مسلکي نرسان شتون لري چې هیڅ ډول خدمت له ناروغانو نه دریغوي.
8. د عاجلو او لومړنیو مراقبتونو برخه (لکه: انژکشنونه، پانسمان، معدې پاکول، فولي تطبیقول، فمي او انفي ټیوب تطبیقول او نور) هغه خدمات دي چې نرسان یې ناروغانو ته برابروي.
9. د روغتون چاپیریال، خوړوخونې او د خوړو د تیارولو د حفظ الصحې کنترول او څارنه.

10. اداري او محافظتي خدمات په دې روغتون کې:
    １. د ناروغانو د مراجعينو ثبت او راجستر په د راجسټریشن او کنترول څانګه کې.
    ２. د اداري اسنادو پروسې (د کارکوونکو استخدام، مکتوبونو، وړاندیزونه، استعلامونه، عریضې او د روغتون نور وارد او صادر اسناد) د مدیریت انسجام له لوري ترسره کېږي.
    ３. د محبوسینو او محبسونو د مرکز او ولایتونو د پرسونل د صحي اسنادو پروسې، او د هغه پرسونل او محبوسینو معرفي کول چې دلته درملنه یې ممکنه نه وي، بهرنیو روغتونونو ته.
    ４. د هغو ناروغ محبوسینو په اړه نظر ورکول چې سخت، مزمن او درملنه یې ګرانه وي، دا کار د متخصصینو او ډاکټرانو له جوړ شوې کمیټې لخوا ترسره کېږي.

اومه برخه: د تماس معلومات او د اپلېکېشن د لاسرسي کچه

اداره: د افغانستان اسلامي امارت د زندانونو چارو د سمون اداره

پته: ارزانه قیمت، د محبس څلور لارې، پلچرخي مرکزي محبس، کابل، افغانستان

د تماس شمېره (نوکریوالي): ۰۲۰۲۳۴۰۵۰۹

• د ادارې رسمي برېښنالیک پته: (( mona1qwdqvzuwn6qj7l9xmsfqur2vc7uda0rcpftv9ej )

د کاري ساعت پیل:  ۸:۳۰ الی ۳:۳۰

اتمه برخه: مهم خبرونه او خبرتیاوې

د زندانونو د تنظیم ادارې ټول رسمي اعلانونه، خبرونه او تازه معلومات د ادارې له رسمي پاڼو څخه خپرېږي.
د دغو پاڼو لینکونه په لاندې ډول دي:

• https://x.com/opa_af?s=21
• https://www.instagram.com/opa_af_2023?igsh=MXRsYTZkaGx6Zml4cw==
• https://youtube.com/@opa-af?si=N9cEkmm6rLxcOjDz
• opa.gov.af

والسلام

الحاج مولوی محمد یوسف"مستری"

د زندانونو چارو د سمون ادارې عمومي رئیس