د جمهوري ریاست د عالي شوراګانو د چارو انسجام ریاست له لوري د چارو ادارې د دولت د چارو انسجام مرستیال ډاکټر عبدالکریم توتاخېل په مشرۍ د هېواد د اوبو مهار، وچکالۍ او سیلابونو د خطرونو مخنیوي په موخه د همغږۍغونډه جوړه شوه.
په دغه غونډه کې، چې د کلیو د بیا رغونې او پراختیا، کرنې، مالدارۍاو اوبو لګولو وزارتونو، د اوبو د چارو تنظیم، اوبو رسولو او هوا پیژندنې ادارو، پيښو ته د چمتوالي چارو کې د دولت وزارت او کابل ښاروالۍ استازو حضور درلود، د هېواد د اوبو سطحې ټیټوالي، د اقلیم بدلون، د وچکالۍ او سیلابونو له امله د احتمالي ګواښونو او دغه راز د اوبو بې ځایه مصرف مخنیوي لپاره د عامه پوهاوي خپرولو په تړاو بحث او نظرونه شریک کړل.
دغه راز په دوو جلا پریزینټیشنونو کې د سیلاب او وچکالۍ د مدیریت ملي پالیسۍ او د اوبو مهار سټراټیژۍ په اړه معلومات وړاندې شول.
په پای کې پرېکړه وشوه، چې اړوند ادارې د سیلاب او وچکالۍد مدیریت ملي پالیسۍ او د اوبو سرچینو د مهار برخه کې جوړو شو پالیسیو او سټراټيژیو د غني کولو په موخه خپل نظرونه د جمهوري ریاست د عالي شوراګانو د انسجام ریاست سره شریک کړي، څو د تایید په موخه د اوبو، ځمکو، ښاري پراختیا او چاپيرېال عالي شورا ناستې ته وړاندې شي.