د چارو ادارې لوی رئیس د کمال خان بند د پروژې په اړه د نېمروز والي سره ولیدل


د جمهوري ریاست د چارو ادارې لوی رئیس ډاکټر فضل محمود فضلي نن د نیمروز والي زمريالي احدي سره وليدل.
په دې ليدنه کې د نېمروز والي د کمال خان بند د پروژې د کاري پرمختګونو معلومات وړاندې کړل.
د نيمروز والي زيربنايي پروژو، په ځانګړي ډول کمال خان بند ته د چارو ادارې د لوی رئیس پاملرنې ته په مننې سره وویل، چې د کمال خان بند چارې په نيږدې وخت کې بشپړيږي او د اوبو اخيستو پړاو يې پيليږي.
د چارو ادارې لوی رئیس د کمال خان بند په اړه د سیمه ييزې ادارې او د دغې پروژې د کارکوونکو د هڅو په قدردانۍ سره د کمال خان بند پر زيربنايي ارزښت ټينګار وکړ.
ډاکټر فضلي ژمنه وکړه، چې د چارو ادارې لوی ریاست به د پراختيايي پروژو د عملي کيدو د چارو د چټکتيا لپاره همغږي او انسجام لا پسې زيات کړي.