په علومو اکاډمۍ کې د اصلاحاتو په موخه غونډه وشوه
د افغانستان د علومو اکاډمۍ د تشکیلاتي جوړښت د اصلاح اوپر دندو او فعاليتونو د بیاکتنې په اړه د جمهوري ریاست د عالي مقام د حکم د تطبيق په تړاو د همغږۍ غونډه د جمهوري ریاست د عالي شورا ګانو د انسجام ریاست له لوري جوړه شوه، چې د علومو اکاډمۍ رئيس، په فرهنګي چارو کې د جمهوري ریاست د عالي مقام سلاکارانو، د جمهوري ریاست د معاونيت د عالي مقام سلاکارانو، د لوړو زده او اطلاعاتو او فرهنګ وزارتونو مرستيالانو او د جمهوري ریاست په حکم کې د شاملو نورو ادارو رئيسانو پکې ګډون درلود.
لومړی، د جمهوري ریاست د دولت د انسجام مرستيال ډاکټر عبدالکریم توتاخېل د افغانستان علومو اکاډمۍ د ارزونې د راپور په اړه خپل نظرونه وړاندې کړل.
دغه راز، د جمهوري ریاست د عالي شورا ګانو د انسجام رئيس وويل، چې په ياد شوي راپور کې د علومو اکاډمۍ د راتلونکو څېړنيزو فعاليتونو لرلید روښانه شوی نه دی.
ورپسې د جمهوري ریاست د دویم معاونيت د عالي مقام فرهنګي مرستيال د علومو اکاډمۍ د ارزونې په اړه معلومات وړاندې کړل.
هغه وويل، چې د جمهوري ریاست د عالي مقام د حکم د تطبيق په موخه د اړوندو ادارو يوه اته کسيزه کمېټه جوړه شوې، چې د ارزونې پر وخت يې لاندې ټکي په پام کې نيولي:
۱. د افغانستان د علومو اکاډمۍ د علمي مجلو د وضعيت شننه او ارزونه؛
۲. د علومو اکاډمۍ د قانون د ځينو موادو تعديل؛
۳. د پوهنتونونو له علمي کادرونو او نظر خاوندانو سره په علومو اکاډمۍ کې د طبيعي او تخنيکي علومو د څانګې د جوړېدو پر څرنګوالي مشوره؛
۴. د علومو اکاډمۍ د علمي غړو ارزونه، چې د مختلفو علومو په برخه کې څېړنې کوي؛
۵. د موجودو کارکوونکو ليست برابرول؛
په غونډه کې له هراړخيزو بحثونو وروسته دا پريکړې وشوې:
پر هغو درېيو محورونو او شپږو شاخصونو، چې غونډه کې بحث پرې شوی، لاندې اقدامات دې ترسره شي:
۱. د افغانستان د علومو اکاډمي مؤظف شوه، چې د دغې اکاډمۍ د وضعيت ښه کيدو په موخه خپلې برنامې ډلبندي او راپور يې د علومو اکاډمۍ د ارزونې کاري کمېټې ته وړاندې کړي؛
۲. د افغانستان د علومو اکاډمۍ د ارزونې کاري کمېټه مؤظف شوه، چې پرخپلې اصلاحي طرحې بيا کتنه وکړي او د جمهوري ریاست د عالي مقام مطابق يې برابره کړي. دغه طرحه دې لومړی د علمي، فرهنګي او بشري پانګو په عالي شورا کې د بحث ته وړاندې او بيا د افغانستان اسلامي جمهوريت کابينې ته واستوي.