د ا.ا.ا د چارو ادارې د بهرنيو اړيکو د انسجام رياست، د فرهنګي او ټولنيزو چاو رياست او د بېلابېلو وزارتونو د استازو ترمنځ بهرنيو هيوادونو ته د دولتي کارمندانو د سفرونو د څرنګوالي اړوند غونډه وشوه، چې پکې د دولتي کارمندانو د بهرنيو سفرونو د ستونزو په حل خبرې وشوې.
دغه غونډه چې نن د چهارشنبې په ورځ (د محرم الحرم ۱۹ مه) نېټه د چارو ادارې د ناستو په تالار کې جوړه شوې وه؛ د قرانکريم په تلاوت سره پيل او ورپسې د چارو ادارې د فرهنګي او ټولنيزو چارو رئيس مولوي عبدالباقي منصور خبرې وکړې.
نوموړي وویل، اسلامي امارت د ادارو د ستونزو د حل لپاره هڅې کوي او زياته يې کړه چې بايد ټولې دولتي ادارې د اداري ستونزو د حل په موخه له يو بل سره په اړيکه کې واوسي.
همدا راز د چارو ادارې د بهرنيو اړيکو د انسجام رئيس مولوي احمدالله امين بهرنيو هيوادونو ته د دولتي کارمندانو د سفر د ستونزو په حل خبرې وکړې.
ښاغلي امین وويل چې سفر کوونکی کارمند د اړينو سفري اسنادو له چمتو کولو او د سفر د موخې او نوعيت له وضاحت وروسته بايد د بهرنيو چارو وزارت له موافقې وروسته خپل وړانديز د تائيد لپاره د رياست الوزراء مقام ته وړاندې کړي.
په غونډه کې د چارو ادارې د بهرنيو اړيکو د انسجام رياست تخنيکي همکارانو د دولتي کارمندانو د بهرنيو سفرونو په اړه لارښوونې او د مراحلو د طی کولو په اړه معلومات وړاندې کړل.
همد راز پريکړه وشوه چې له رسمي سفرونو وروسته به اړوند وزارت د خپل سفر ټول ګزارش د رياست الوزراء مقام ته ورکوي او د سفر اهدافو او لاسته راوړنو په اړه به معلومات وړاندې کيږي.
دا غونډه هيواد، نظام او ولس ته د خير په دعا سره پای ته ورسېده.