د ازبکستان له سرخان څخه د بغلان د خواجه الوان پورې د 500 کیلو ولټ برېښنا مزي د انتقال پروژې د ستونزو حل په موخه غونډه وشوه

د ازبکستان له سرخان څخه د بغلان د خواجه الوان پورې د 500 کیلو ولټ برېښنا مزي د انتقال پروژې د ستونزو حل په موخه غونډه وشوه


د جمهوري ریاست د چارو ادارې لوی رییس ډاکټر فضل محمود فضلي په حضور کې د مالیې وزارت سرپرست خالد پاینده، د ملي تدارکاتو ادارې رییس کبیرخان عیسی خېل، د چارو ادارې د پانګونې د اسانتیا واحد رییس عطاالله نصیب، د برېښنا شرکت او د جمهوري ریاست د حقوقي واحد استازو سره د د ازبکستان له سرخان څخه د بغلان د خواجه الوان پورې د 500 کیلو ولټ برېښنا مزي د انتقال پروژې د ستونزو حل په موخه غونډه وشوه.
په دغه غونډه کې د چارو ادارې لوی رییس د 500 کیلو ولټ برېښنا مزې د لیږد پروژې د نه تطبیق د لاملونو په اړه خبرې وکړې.
ښاغلي فضلي په ذکر شوې پروژه کې د رامنځته شویو ستونزو د حل په موخه د اسیايي پراختیایي بانک ته په یو راپور کې د پروژې د جزیاتو د وضاحت وړاندې کولو، د پروژې د حقوقي او عملیاتي خنډونو مشخص کیدو او د جمهوري ریاست عالي مقام ته د یو جامع یاددښت ترتیب کیدو ټینګار وکړ.
دغه راز د افغانستان برېښنا شرکت استازي د دې پروژې د حقوقي او عملیاتي مواردو په تړاو بحث وکړ ویې ویل، د ازبکستان NEGU)) کمپنۍ د قرارداد د موادو مطابق خپل مسوولیتونه نه دي اجرا کړي او که چیرې قراردادي کمپنۍ د یادې پروژې عملي چارې پېل کړي، د برېښنا شرکت د خپل اړوند مسوولیتونو اجرا کول وته چمتو دي.
په پای کې له هر اړخیزو بحثونو وروسته پرېکړه وشوه، چې اړوندې ادارې د دغه ملي پروژې اهمیت په نظر کې نیولو سره د شته ستونزو حل په موخه خپل استازي مشخص کړي، څو د 500 کیلو ولټ برېښنا مزې د انتقال پروژې عملي کار پېل شي.