عقلی ضعیف باله‌لر اوچون حمایه‌وي مرکزلر ایجاد اېتیلیشی تۉغریسیده‌گی جمهور رییسلیک عالي مقامی‌نینگ هدایتینی تعقیب اېتیش بۉییچه ییغیلیش اۉتکزیلدی
عقلی ضعیف باله‌لر اوچون حمایه‌وي مرکزلر ایجاد اېتیلیشی تۉغریسیده‌گی جمهور رییسلیک عالي مقامی‌نینگ هدایتینی تعقیب اېتیش بۉییچه، ا.ا.ج. رییسلیک ایشلر اداره‌سی فرهنگي و اجتماعي ایشلر ریاستی تامانیدن اوشبو اداره‌نینگ دولت ایشلرینی منسجملشتیریش ریاستی اۉرین‌باسری عبدالکریم توتاخیل رهبرلیگیده و اجتماعي ایشلر وزیرلیگی، عامه ساغلیک وزیرلیگی، خاتین-قیزلر وزیرلیگی، عدلیه وزیرلیگی، قیزیل آی اداره‌سی و ملي خریدلر اداره‌سی نماینده‌لری اشتراکیده ییغیلیش اۉتکزیلدی.
ا.ا.ج. رییسلیک ایشلر اداره‌سی‌نینگ اۉرین‌باسری، اوشبو ییغلیشدن مقصد عقلی ضعیف بۉلگن باله‌لرگه قوله‌یلیک یره‌تیش و جمهور رییسلیک عالي مقامی‌نینگ هدایتینی تعقیب اېتیش‌دیر، دېب، مملکت جلالتمآب جمهور رییسی بۉیروغی اساسیده عقلی ضعیف بۉلگن باله‌لرگه حمایه‌وي مرکزلر ایجاد اېتیش تۉغریسیده تیارلنگن لایحه کۉریب چیقیلیب، علاقه‌لی اداره‌لر بیلن هماهنگلیکده عملي اېتیلیشی لازم، دېیه تأکید قیلدی.
اجتماعي ایشلر وزیرلیگی‌نینگ نماینده‌سی، عقلی ضعیف بۉلگن باله‌لر اوچون حمایه‌وي مرکزلر ایجاد اېتیلیشی خصوصیده تیارلنگن لایحه‌نی توضیح اېتیب، بو لایحه تۉغریسیده مالیه وزیرلیگی بیلن نېچه مراتبه صحبت اۉتکزیلگن، بونده مذکور وزیرلیک‌نینگ همکارلیگی اساسي شرط‌دیر، دېدی.
عینِ حالده، عامه ساغلیک وزیرلیگی‌نینگ نماینده‌سی عقلي کسللر و عقلی ضعیف بۉلگن باله‌لرنی دوالش اوچون یېترلی بۉدجه بۉلمه‌گنلیگی تۉغریسیده معلومات بېریب، جمهور رییسلیک عالي مقامی‌نینگ بۉیروغی عملگه آشیشی اوچون هر تامانلـَمه یاردم بېریشینی معلوم قیلدی.
قیزیل آی اداره‌سی‌نینگ سکرتر جنرالی جلالتمآب جمهور رییس‌نینگ عقلی ضعیف کیشیلرنی حمایه قیلیش تۉغریسیده توجهی بۉییچه منتدارچیلیک بیلدیریب، بو حمایه‌وي مرکزلرنینگ بیر ییللیک مالي خرجاتینی قیزیل آی اداره‌سی تامانیدن تۉللـه‌یمیز، دېیه وعده بېردی.
ییغیلیش سۉنگ چاغیده، اجتماعي ایشلر وزیرلیگی صحنیده عقلی ضعیف بۉلگن باله‌لر اوچون حمایه‌وي مرکزلر اوچون اختصاصلنگن بنا تعمیر اېتیلیب، عدلیه وزیرلیگی، خاتین-قیزلر وزیرلیگی و ا.ا.ج. رییسلیک ایشلر اداره‌سی نماینده‌لریدن تشکیل قیلینگن قۉشمه کمیته مذکور لایحه ایشلرینی یکونلنتیریب اونی ا.ا.ج. رییسلیک ایشلر اداره‌سیگه جۉنتیشلری لازم، دېیه قرار قیلیندی.